सिलगढी, साउन १७
देशभर मनसुनी वायु सक्रिय रहेकाले आज पनि अधिकांश क्षेत्रमा वर्षाको सम्भावना रहेको छ। जल तथा मौसम पूर्वानुमान महाशाखाले कोशी, बागमती, गण्डकी, लुम्बिनी र कर्णाली प्रदेशका पहाडी भूभागका एक–दुई स्थानमा भारी वर्षा हुन सक्ने जनाएको छ।
महाशाखाका अनुसार मनसुनको न्यून चापीय रेखा पश्चिमी भूभागमा सरदर स्थानको आसपास तथा पूर्वी क्षेत्रमा सरदर स्थानभन्दा केही उत्तरतर्फ अवस्थित छ। हाल सुदूरपश्चिम प्रदेशको तराईमा आंशिक बदली रहे पनि देशका बाँकी अधिकांश क्षेत्रमा सामान्यदेखि पूर्ण बदली रहेको छ। कोशी, बागमती, गण्डकी, लुम्बिनी र कर्णाली प्रदेशका विभिन्न स्थानमा हल्कादेखि मध्यम वर्षा भइरहेको छ।
आज दिउँसो देशभर सामान्यदेखि पूर्ण बदली रहने अनुमान गरिएको छ। हिमाली क्षेत्रका केही स्थानमा वर्षासँगै हिमपात, पहाडी क्षेत्रमा धेरै स्थानमा तथा तराईका केही स्थानमा मेघगर्जन र चट्याङसहित हल्कादेखि मध्यम वर्षा हुने सम्भावना रहेको छ। विशेषगरी कोशी, बागमती, गण्डकी, लुम्बिनी र कर्णाली प्रदेशका पहाडी क्षेत्रमा भारी वर्षाको जोखिम रहेको महाशाखाले जनाएको छ।
रातिको समयमा पनि अधिकांश क्षेत्रमा वर्षाको क्रम जारी रहने पूर्वानुमान छ। कोशी, बागमती र गण्डकीका हिमाली क्षेत्र तथा लुम्बिनी, कर्णाली र सुदूरपश्चिमका हिमाली भूभागका केही स्थानमा वर्षा तथा हिमपात हुन सक्नेछ। यस्तै, पहाडी र तराईका धेरै स्थानमा मध्यम वर्षा हुने सम्भावना रहेको छ।
महाशाखाले कोशी, बागमती र गण्डकी प्रदेशका हिमाली, पहाडी र तराई क्षेत्र, मधेश प्रदेश तथा लुम्बिनी प्रदेशका तराईका केही स्थानमा भारीदेखि धेरै भारी वर्षा हुन सक्ने भएकाले बाढी, पहिरो, गेग्रान बहाव र भू–क्षयको जोखिमप्रति सतर्क रहन आग्रह गरेको छ। साथै प्रतिकूल मौसमले दैनिक जनजीवन, कृषि, स्वास्थ्य सेवा, पर्यटन, पर्वतारोहण तथा सडक र हवाई यातायातमा असर पार्न सक्ने भएकाले मौसमसम्बन्धी अद्यावधिक सूचना नियमित रूपमा पछ्याउन विभागले अनुरोध गरेको छ।
